ஸ்ரீவிஶ்ணு ஸஹஸ்ரநாம பாஶ்யம் - ஸ்ரீஆதிஶங்கர பகவத்பாதர் அருளியது - பாகம் 155

23, குருர்குருதமோ தாம: ஸத்ய: ஸத்யபராக்ரம: |

நிமிஶோSநிமிஶ: ஸ்ரக்வீ வாசஸ்பதிருதாரதீ:||

இந்த இருபத்தி மூன்றாவது ஸ்லோகத்தில் 9 திருநாமங்கள் உள்ளன. அவையாவன.

209. குரு:, 210. குருதம:, 211. தாம, 212. ஸத்ய:, 213. ஸத்யபராக்ரம: |

214. நிமிஶ:, 215. அநிமிஶ:, 216. ஸ்ரக்வீ, 217. வாசஸ்பதிருதாரதீ: ||

இந்த திருநாமங்களின் விளக்கம் (சுருக்கமாக): 

209. ஓம் குரவே நம:

ஸர்வவித்யானாமுபதேஶ்ட்டத்வாத் ஸர்வேஶாம் ஜனகத்வாத்வா குரு:

அனைத்து வித்தைகளையும் உபதேசிக்கும் ஆசிரியராக இருப்பதாலும், அனைவரையும் (அனைத்தையும்) தோற்றுவிக்கும் தந்தையாக இருப்பதாலும் பகவான் 'குரு' என்ற திருநாமத்தால் அழைக்கப்படுகிறார். 

210. ஓம் குருதமாய நம:

விரிஞ்ச்யாதீனாமபி ப்ரஹ்மவித்யாஸம்ப்ரதாயகத்வாத் குருதம:

அனைவரையும் படைப்பதால் நான்முகக் கடவுளான ப்ரஹ்மா அனைவருக்கும் குருவாகக் கருதப்படுகிறார். அந்த ப்ரஹ்மாவே, ப்ரஹ்ம ஞானத்தை பகவானிடமிருந்துதான் கற்கிறார். இவ்வாறு, ப்ரஹ்மா முதலானோருக்கும் ப்ரஹ்ம ஞானத்தை தந்தருளுவதால், பகவான் 'குருதம' என்ற திருநாமத்தால் அழைக்கப்படுகிறார். 

211. ஓம் தாம்னே நம:

தாம ஜ்யோதி: 'நாராயண பரோ ஜ்யோதி:' (நாராயண உபநிஶத் 13.1) இதி மந்த்ரவர்ணாத் தாம:

தாம என்றால் ஒளிமிக்கது என்று பொருள். மிகச்சிறந்த ஒளிவடிவினராக இருப்பதால் பகவான் 'தாம:' என்ற திருநாமத்தால் அழைக்கப்படுகிறார். 

ஸர்வகாமானாமாஸ்பதத்வாத்வா தாம:

நம் அனைத்து ஆசைகளும் பகவானின் கருணையாலேயே நிறைவேறுகின்றன. அனைத்து ஆசைகளும் முடிவில் பகவானையே சென்றடைகின்றன. எனவே, பகவான் 'தாம:' என்ற திருநாமத்தால் அழைக்கப்படுகிறார்.

212. ஓம் ஸத்யாய நம:

ஸத்யவசன தர்மரூபத்வாத் ஸத்ய 

எங்கெங்கெல்லாம் உண்மையும், அறமும் நிலைத்திருக்கிறதோ, அங்கெங்கெல்லாம் பகவான் இருக்கிறார். மேலும், அவர் (வேதங்களின் வடிவில்) உண்மையான கூற்றாகவும் இருக்கிறார். எனவே, பகவான் 'ஸத்ய' என்ற திருநாமத்தால் அழைக்கப்படுகிறார்.

ஸத்யஸ்ய ஸத்யமிதி வா ஸத்ய 

உண்மை எங்கிருந்தாலும், எதனில் இருந்தாலும் அதில் பகவான் உறைகிறார் என்றே கொள்ளவேண்டும். பகவான் அல்லது வேறு உண்மை எதுவுமில்லை. அவர் மாறாத அனைத்திற்குள்ளும் உறைந்து அவற்றிற்கு மாறாத தன்மையை அளிக்கிறார். எனவே, பகவான் 'ஸத்ய' என்ற திருநாமத்தால் அழைக்கப்படுகிறார்.

213. ஓம் ஸத்யபராக்ரமாய நம:

ஸத்ய: அவிதத: பராக்ரமோ யஸ்ய ஸ: ஸத்யபராக்ரம: 

பகவானின் சக்தியும், வீரமும் என்றும் மாறாதவை (நித்தியமானவை). அவை ஒரு நாளும் வீண்போவதில்லை. எனவே, அவர் 'ஸத்யபராக்ரம:' (உண்மையான வீரமுடையவர்) என்ற திருநாமத்தால் அழைக்கப்படுகிறார். 

214. ஓம் நிமிஶாய நம:

நிமிலிதே யதோ நேத்ரே யதோ யோக நித்ராரதஸ்ய அதோ நிமிஶ:

பகவான் யோக நித்திரைக் கொள்ளும் பொழுது அவரது கண்கள் மூடியுள்ளன. எனவே, அவர் 'நிமிஶ:' என்ற திருநாமத்தால் அழைக்கப்படுகிறார்.

215. ஓம் அநிமிஶாய நம:

நித்ய ப்ரபுத்தஸ்வரூபத்வாத் அநிமிஶ: 

பகவான் எப்பொழுதும் விழிப்புடனே இருக்கிறார். நம்மைப் போன்று அவர் தூங்குவதில்லை. எனவே, அவர் 'அநிமிஶ:' என்ற திருநாமத்தால் அழைக்கப்படுகிறார்.

மத்ஸ்யரூபதயா வா ஆத்மரூபதயா வா அநிமிஶ:

பகவானின் முதலில் மீனாய் திருவவதாரம் செய்தார். மீன்கள் இயற்கையாகவே தம் இமைகளை மூடாது. எனவே, பகவான் 'அநிமிஶ:' (கண்களை மூடாதவர், விழிப்புடன் இருப்பவர்) என்று அழைக்கப்படுகிறார். மேலும், அனைத்து உயிரினங்களுக்குள்ளும் உள்ளுறை ஆத்மாவாக இருக்கிறார். புலன்கள் தூங்கினாலும் (அடங்கினாலும்) ஆத்மா தூங்குவதில்லை. எனவே, பகவான் 'அநிமிஶ:' (கண்களை மூடாதவர், விழிப்புடன் இருப்பவர்) என்று அழைக்கப்படுகிறார்.

216. ஓம் ஸ்ரக்விணே நம:

பூததன்மாத்ரரூபாம் வைஜயந்த்யாக்யாம் ஸ்ரஜம் நித்யம் பிபர்த்தீதி ஸ்ரக்வீ 

பகவான் பஞ்சபூதங்கள், மற்றும் அனைத்து தன்மாத்திரைகளின் வடிவான 'வைஜயந்தி' என்ற மாலையை எப்பொழுதும் அணிந்துள்ளார். எனவே, அவர் 'ஸ்ரக்வீ' என்ற திருநாமத்தால் அழைக்கப்படுகிறார்.

217. ஓம் வாசஸ்பதய உதாரதியே நம:

வாசோ வித்யாயா பதி: வாசஸ்பதி: ஸர்வார்த்தவிஶயாதீர் புத்திரஸ்யேத்யுதாரதீ:வாசஸ்பதிருதாரதீ: இத்யேகம் நாம 

'வாச' என்றால் அனைத்துவித ஞானத்தையும் (அறிவையும்) குறிக்கும். வாசஸ்பதி என்றால் 'அறிவின் தலைவர்' என்று பொருள். அனைத்தையும் உள்ளபடி அறியும் அறிவைப் பெற்றிருப்பதால் 'உதாரதீ' என்று அழைக்கப்படுகிறார். எனவே, பகவான் 'வாசஸ்பதிருதாரதீ' என்ற திருநாமத்தால் அழைக்கப்படுகிறார். பொருள் தனித்தனியே இருப்பினும் 'வாசஸ்பதி', 'உதாரதீ' அகியவை இணைந்து 'வாசஸ்பதிருதாரதீ' என்று ஒரே திருநாமமாக வழங்கப்பட்டுள்ளது.